पुणे : पूना हॉटेलिअर्स असोसिएशनच्या अध्यक्षपदी २०१९-२०२० या वर्षासाठी शरण शेट्टी यांची निवड झाली आहे. हॉटेल वेस्टिन येथे झालेल्या असोसिएशनच्या वार्षिक सर्वसाधारण सभेत शेट्टी यांची निवड करण्यात आली.
शरण शेट्टी म्हणाले, ‘या वर्षी अध्यक्षपदी माझी निवड केल्याबद्दल मी सदस्यांचा आभारी आहे. गेल्या वर्षी नीरव पंचमिया यांच्या अध्यक्षतेखाली अनेक उपक्रम राबवण्यात आले. प्रादेशिक संघटनांसह सरकारशी समन्वय साधून, या क्षेत्राच्या विविध अडचणी दूर करण्याबाबत पूना हॉटेलिअर्स असोसिएशन महाराष्ट्रात सक्रियपणे कार्यरत आहे. या वर्षी आम्ही सदस्यांसाठी चर्चासत्रे, प्रशिक्षण वर्ग यांसह क्रिकेट स्पर्धांसारखे उपक्रम आखले आहेत.’
२०१९-२० या वर्षासाठी संघटनेच्या कार्यकारी समितीची निवडही या वेळी करण्यात आली. मानद सचिव सुरेश तलेरा, माजी अध्यक्ष नीरव पंचमिया, वरीष्ठ उपाध्यक्ष प्रतीक रे, उपाध्यक्ष नासिर शेख, सचिव आदित्य मल्ला, सचिव श्रीनिवास चाफळकर, संयुक्त सचिव विनित मिश्रा आणि महासचिव प्राप्ती देशपांडे यांचा त्यात समावेश आहे.
पूना हॉटेलिअर्स असोसिएशन ही पश्चिम भारतातील हॉटेल उद्योग क्षेत्रातील सर्वांत सक्रिय संघटना असून, पुण्यातील ६८पेक्षा अधिक हॉटेल्सचा त्यात समावेश आहे. दर महिन्याला सदस्यांची बैठक घेणे, त्यात अनुभवी तज्ज्ञांचे मार्गदर्शन घडवणे असे विविध उपक्रम संघटनेतर्फे राबवले जातात. यामध्ये प्रशासनातील वरिष्ठ अधिकारी, या क्षेत्रातील तज्ज्ञ व्यक्ती यांचे मार्गदर्शनपर कार्यक्रम सातत्याने आयोजित करण्यात येत असल्याने संघटना भक्कम होण्यास मदत होते, तसेच सदस्यांच्या ज्ञानात भर पडते. सदस्यांना काही अडचणी आल्यास त्या दूर करता येतात.
या क्षेत्राच्या वाढीसाठी प्रशिक्षित मनुष्यबळ हा महत्त्वाचा घटक आहे, यावर पूना हॉटेलिअर्स असोसिएशनचा विश्वास आहे. ही गरज पूर्ण करण्यासाठी प्रत्येक महिन्यात कर्मचाऱ्यांसाठी प्रशिक्षण शिबिरे, चर्चासत्रे आयोजित केली जातात.
